Медициналық жоғары оқу орындары студенттерінің "Самарқанд-2020" халықаралық онлайн- олимпиадасы аяқталды. Ол Самарқанд мемлекеттік медициналық институтының (Өзбекстан) базасында өтіп, ТМД-ның әртүрлі елдерінен 2000 қатысушыны қамтыды. Қазақстанның атынан Алматы, Қарағанды және Петропавл қалаларының медициналық университеттерінің білім алушылары қатысты.
Олимпиада қорытындысы бойынша патологиялық физиология секциясында Қозыбаев университетінің Жоғары медицина мектебінің студенттері Павел Николайзин мен Шыңғыс Дәулетбаев жүлделі орындарға ие болды. Олар "Жалпы медицина" білім беру бағдарламасы бойынша 3 курста оқиды.
Сонымен қатар, Шыңғыс Дәулетбаев жас зерттеушілердің ғылыми-инновациялық жобалары байқауында "Ғылыми-техникалық прогресс" номинациясындағы жеңісі үшін 1 дәрежелі диплом алды. Ол коронавирустық инфекцияның ұйқы безіне әсері туралы баяндама дайындады, бұл бүгінгі күннің өзекті тақырыбы. Бұл байқауға 100-ге жуық адам қатысқандығы ерекше мақтаныш. Олардың арасынан біздің студент жүзден жүйрік атанды! Студенттің ғылыми жетекшісі Жекенова Г.Е. "Фудаменталдық медицина" кафедрасының оқытушысы, дәрігер-педиатр, инфекционист.
Ғылымдағы алғашқы қадамдар студенттер үшін өте сәтті болды. Білім алушыларға тек сәттілік тілейміз! Зияткерлік әлеуетімізді арттыра отырып, біз болашақты құрамыз!
