Қозыбаев университеті магистранты Богдан Петров ҚР Білім және ғылым министрлігінің Студенттер мәселелері жөніндегі кеңесінің құрамына кірді. Бұл ведомство басшысы Асхат Аймағамбетовтың бастамасымен құрылған консультативтік-кеңестік орган. Оның негізгі міндеті- жоғары оқу орындарының білім алушылары мен жетекшілік ететін мемлекеттік орган арасында тікелей диалог алаңын құру.
Бірінші отырыс онлайн-форматта өтті. Күн тәртібіне Кеңес туралы ережені, оның жұмыс жоспарын әзірлеу мәселелері шығарылды. Кездесуге қатысқан 60-қа жуық көшбасшы осындай бастамаларды қолдаудың ерекше маңыздылығын атап өтті, өйткені елдің әрбір азаматының дауысы міндетті түрде естілуі тиіс. Бұл әсіресе білім беру жүйесінде өте маңызды, өйткені терең білім - болашақтың берік негізі.
Білім және ғылым министрі Асхат Аймағамбетов кеңес қызметі және еліміздің жоғары мектебін одан әрі жетілдіру аясындағы жоспарлар туралы ақпаратпен бөлісті. Мәселен, университеттер арқылы емес, тікелей ҚР БҒМ арқылы стипендия төлеу, сыбайлас жемқорлық қылмыстар жасалатын ЖОО-ларының лицензиясынан айыру мәселелері қарастырылуда. Бұл оқу орындары қызметіндегі ашықтық пен айқындықты арттыруға мүмкіндік береді. Сонымен қатар, кездесу барысында онлайн-прокторинг жүйесі туралы сөз қозғалды. Осыдан бұрын студенттер әлеуметтік желілерде оған наразылық білдірген болатын. Кеңес мүшелері осы бағдарламаны енгізу қажеттігін айтты, себебі академиялық адалдық алған білім сапасын қамтамасыз етеді.
Білім алушыларды волонтерлікпен айналысуға ынталандыруға арналған «Әлеуметтік студенттік кредит» бағдарламасын іске асыру мәселесі жеке тармақпен қаралды. Қатысушылар оның 2020 жылғы қорытындылары мен еріктілерде туындайтын қиындықтар туралы айтты.
Кездесуге қатысушылар көтеріліген сұрақтар бойынша пікір алмасты, ведомство басшысына белсенді түрде сұрақтар қойды. Студенттердің мәселелері бойынша кеңес отырыстарын тоқсанына кемінде бір рет өткізу, ал ағымдағы жылдың соңына дейін жұмыс жоспарын құру үшін ұсыныстар енгізу туралы шешім қабылданды.