«Қазақстан», «Хабар», «НТК» телеарналарында еңбек өтілі зор тәжірибелі журналист Шынар Омарова онлайн режімде М. Қозыбаев атындағы СҚУ-дың «Журналистика» кафедрасының 3-4 курс студенттерімен кездесіп, шеберлік сыныбын өткізді.
Қазіргі таңда ол "А÷A idea fabric" продюсерлік орталығының бас редакторы, Шалқар радиосы, "Ауыл life" бағдарламасының журналист-жүргізушісі. Шынар Жұмаханқызы болашақ журналист ретінде ең алдымен қай саланы, қай бағытта жазатыныңды бүгіннен шешіп ал дейді. Сонымен қатар өзінің бастапқыда неліктен радио саласын таңдағанымен бөлісті. «Жүрегіме жақыны осы сала», - деп тебіренген ол радиожурналистиканың қоғамдық өмірдегі орнына үлкен баға берді.
Журналистика – табанды еңбекті, жауапкершілікті талап ететін мамандық екенін атап өтті. Сөзінше, журналист өзінің ішкі дүниесі қызығатын бағытта қызмет етсе, оның қолынан барлығы келеді. Дәріскер болашақ журналистерге қазірден бастап өз мамандығына бойлауға, бір орында отырмай, қызмет етуге дағдылануға, алған білімін тәжірибе жүзінде көрсетуге мотивация берді.
