Білім ошағымыз профессор, Қазақстанның еңбек сіңірген қайраткері, Қазақстан жоғары мектебінің еңбек сіңірген қайраткері, филология ғылымдарының кандидаты, көрнекті абайтанушы, абылайтанушы жəне мағжантанушы ғалым Зарқын Сыздықұлы Тайшыбайдың шығармашылық қызметінің 60 жылдық мерейтойын атап өтті. Журналистика саласында еңбегі сіңген ұлы тұлға 40 жыл мұғалімдік қызметте табысты еңбек етіп, бүгінде ел ішінде түрлі салада қызмет атқарып жүрген шәкірттер тәрбиеледі.
Салтанатты басқосуда әріптестері мен жолдастары ғалымның еңбек жолындағы санадан сөнбес сәуледей сәттерін сөз етсе , шәкірттері болса теңіздей тұнық терең мағыналы туындыларына кеңінен тоқталды.
Мерейтой иесінің шығармашылық кешіне оқытушылар мен студенттер қатысып, жылы лебіздер мен игі тілектерін білдірді. Солтүстік Қазақстан облысы әкімінің орынбасары Ғани Нығметов жиналған қонақтарға аймақ басшысының құттықтау сөзін жеткізді. Дәстүр бойынша құрметті ұстаз, ғалымға ұлттық шапан жабу салтанаты өтті.
Шығармашылық еңбек жолын 1960 жылы 1 қазанда аудандық «Ленин туы» газетінде əдеби қызметкер болып бастаған Зарқын Сыздықұлы, аудандық кеңес атқару комитетінде бөлім бастығы, аудандық газет редакторының орынбасары, редактор, облыстық газетте бөлім бастығы қызметтерін атқарды. Кейін, сол уақыттағы С.М. Киров атындағы Қазақ мемлекеттік университетінің журналистика факультетін, «Журналистика тарихы» кафедрасы бойынша аспирантураны тəмамдады. Бұдан соң 1992 жылы Бөкетов атындағы Қарағанды мемлекеттік университетінде Қазақстандағы екінші «Журналистика» мамандығын ашып, журналистика кафедрасын басқарған . Бұдан бөлек, Зарқын Тайшыбайдың ғылымға сіңірген үлесі зор. Оның 10 монографиясы, 12 оқу құралы мен оқулықтары, 250-ге тарта мақалалары жарыққа шыққан. Осы игі істері үшін ғалымға 2012 жылы «Жоғары оқу орнының үздік оқытушысы» атағы берілді.
Профессор З. Тайшыбайдың «Абылай хан» кітабы бес рет қайта басылып, тараған. Зарқын Сыздықұлының ғылыми жетекшілігімен көрнекті қайраткерлері Мағжан Жұмабайдың, Смағұл Сəдуақасовтың, Сəбит Мұқановтың, Сафуан Шəймерденовтің, Еслəм Зікібаевтың, Мүталлап Қанғожиннің, Бақыт Мұстафиннің, Жарасбай Сүлейменовтің, Бүркіт Бекмағамбетов жəне басқалардың шығармашылығы туралы ғылыми еңбектер мен зерттеулер жазылды.
Тəжірибелі ұстаз, республикадағы журналистік білімді ұйымдастырушыларының бірі ретінде Зарқын Тайшыбай білім берудің халықаралық тəжірибесін игеруден жалыққан емес. Қазіргі таңда бірқатар еңбектердің авторы , шыңдалған журналист , болашақ маман иелеріне қашан да ұлыларға бой түзеп, өсіп, өркендеп, белестерді бағындырындар деген нұсқаулығын білдірген болатын.
