Тіл– әрбір халықтың мәдени игілігі мен байлығы. Әр түрлі қауымдастықтарды біріктіреді және жақындастырады, өз тіліміздің қадір-қасиетін арттырып, өзге тілді құрметтеуді насихаттайды. Қазақстанда тәуелсіздік алған кезеңнен бастап тіл саясаты елде тұратын этностардың барлық тілдерін сақтауға, орыс тілін ресми тіл ретінде пайдалануға, ағылшын тілін үйренуге және қазақ тілі– мемлекеттік тілді қолдану аясын кеңейтуге бағытталған. Ана тілдерін сақтау және оларды оқып-үйренуге жағдай жасау– Қазақстан этносаясатының міндеттерінің бірі.
Осыған орай «Қазақстан халқы ассамблеясы» кафедрасы мен Петропавл қаласының №17 ұлттық өркендеу орта мектеп-кешенімен бірлесіп, халықаралық ана тілі күніне арналған «Тілдер планетасы» атты халықаралық онлайн музыкалық-поэтикалық лингвостудиясын өткізді. Шараға әлемнің 6 елінен оқушылар мен студенттер қатысуға ниет білдірді. Атап айтсақ, оған Қазақстан, Беларусь, Өзбекстан, Моңғолия, Қытай, Үндістан елдері кіреді. 18 тілде мақал-мәтелдер, аңыздар, әйгілі ақындардың өлеңдері мен халық әндері шырқалды.
Қатысушылар қазақ, орыс, ағылшын, өзбек, украин, неміс, татар, поляк, шешен, белорус, армян, француз, түрік, корей, моңғол, хинди, кашмири, қытай тілді өлеңдерінің дыбыстары мен әдемі дауыс ырғағына қанықты.
