«Qyzyljar – adaldyq alany» және «Jas Otan» ЖҚ өкілдері мен ТжӘЖ департаменті бірлесіп Қозыбаев университетінің жатақханаларында студенттердің тұрмыстық жағдайы мен өмір сүру сапасын тексерді. Білім ордамыздың осындай екі нысаны бақылауда болды: №1, №3 жатақханалары. Университет жатақханаларында қоғамдық бірлестіктер мен сыбайлас жемқорлыққа қарсы қызмет өкілдерінің рейдтері жылына бірнеше рет өткізіліп тұрады.
Бүгінгі күні үш студенттік жатақханаларда барлығы 693 студент орын тепкен. Бұл бірінші курс студенттері, сонымен қатар аралас оқыту форматына көшкен 2-3 курс студенттері.
Рейд барысында қадағалаушылар жатақханалардың жай-күйімен, санитарлық-гигиеналық нормалардың сақталуымен, инфрақұрылымның қол жетімділігімен танысты. Тексерушілер бейтаныс адамдардың тұрмайтындығына көз жеткізді. Бүгінгі таңда эпидемиологиялық талаптарға сәйкес жатақхана толымдығы 50%-дан аспайды.
Психологиялық ахуалға да баға берілді. Әр қабатта бөлмелердің, асүйлердің, жуыну бөлмелерінің қазіргі жай-күйі қаралып, тексерілді. Студенттердің бос уақыттарын тиімді өткізуге жағдай жасалған. Жаңадан орнатылған құрылғының арқасында әр қабатта wi-fi тегін әрі қол жетімді. Бұл қашықтықтан немесе аралас форматта оқитын студенттердің оқу жағдайын жақсарту мақсатында жасалған.
Мұндай қарқындағы тексеру жұмыстары мен мониторингтер білім беру мекемелеріндегі бюрократиялық кідірістер мен сыбайлас жемқорлықты болдырмауға негіз болмақ. Бүгінде жатақханаға тіркелу рәсімі университеттің ресми веб-сайты арқылы электронды түрде жүзеге асырылады. Сондай-ақ, университет басшылығы мен студент белсенділерінен құралған комиссия жұмыс атқарады.
Тексеру барысында Қозыбаев университетінің жатақханаларында заң бұзушылықтар анықталған жоқ, студенттерден шағымдар түспеді. Мониторинг тобы өкілдерінің айтуынша, мұндай рейдтер қаланың барлық оқу орындарының жатақханаларында өтеді.
