Ұлыстың ұлы күні Наурыз мейрамы- береке мен татулықтың, тазалық пен ізгіліктің тұғырын нығайтатын, жаңа жылдың бастауы. Ұлық мерекені дәстүрлі түрде білім ордамыз жыл сайын атап өтуде.
Бүгінгі мерекелік іс-шараны салтанатты түрде Басқарма Төрағасы-Ректоры Ерлан Шұланов ашып, барша қауымға жылы лебізін білдірді. Атаулы мерекеге орай, оқу ордамыздың бірқатар оқытушылары, еңбек ардагерлері мен қызметкерлерін марапаттау рәсімі өтті.
Білім беру жүйесін дамытуға және білім беру сапасын арттыруға қосқан үлесі үшін ҚР Білім және ғылым министрінің Құрмет грамотасы «Ақпараттық-коммуникациялық технологиялар» кафедрасының меңгерушісі Евгения Кухаренко мен «Құқық пәндері» кафедрасының аға оқытушысы Марат Жарылғапқа табысталды. Сондай-ақ ҚР Білім және ғылым министрі жоғары білім беру жүйесінде жас мамандарды даярлауға қосқан үлесі үшін «Құрылыс және дизайн» кафедрасының аға оқытушысы Нұрлан Имамбаевқа алғыс білдіреді.
Университетіміздің екі өкілі «Қазақстанның құрметті профессоры» атағына ие болды. «Журналистика» кафедрасының профессоры Зарқын Тайшыбай және ҒжИ жөніндегі Басқарма мүшесінің м.а. Ақмарал Ибраева марапатталды.
Ұлыстың Ұлы күніне орай апта бойы ұлттық нақышты дәріптеуге бағытталған тәртіпті сақтай отыра университет қабырғасында ақ қанатты киіз үйлер тігілді.
