Қозыбаев университеті студенттерге тәжірибеден өтуге және оқытушылар құрамының біліктілігін арттыруға мүмкіндік беру үшін ҚР білім беру ұйымдарымен серіктестікті дамытады. Осы аптада ынтымақтастық туралы құжатқа академиялық сауалдар жөніндегі Басқарма мүшесінің м.а. Жанар Таласпаева және Ж.Мусин атындағы Көкшетау жоғары қазақ педагогикалық колледжінің директоры Нұртас Ахат қол қойды. Білім мен ғылымды интеграциялау, тәжірибе алмасу саласындағы екі жақты қатынастарды дамыту жоспарлануда.
Колледжде «Логопедия» мамандығы ашылмақ. Университет тарапы көмек көрсетіп, арнайы оқытушылар даярлаудағы озық педагогикалық тәжірибемен бөлісуге ниетті. Сондай-ақ, серіктес білім беру мекемесінің түлектеріне техникалық және кәсіптік, орта білімнен кейінгі білім беру мамандықтары мен білім беру бағдарламалары арқылы университетте педагогикалық ғылымдар бойынша білімін жалғастыру мүмкіндігі беріледі.
Өз кезегінде, әріптестер Қозыбаев университетінің студенттеріне колледж базасында педагогикалық практикадан өтуге, педагогикалық зерттеулер жүргізуде, оқу бағдарламаларын, оқулықтар мен оқу-әдістемелік құралдарды әзірлеуде ғылыми ынтымақтастықты жүзеге асыруға қолдау көрсетеді.
Сондай-ақ алдағы жоспар бойынша бірлескен ғылыми жобаларды жүзеге асыру, оқытушылар құрамымен дәріс оқу үшін академиялық алмасу, өзара қызығушылық тудыратын салаларда ғылыми-зерттеу жұмыстарын жүргізу, инновациялық әдістермен алмасу көзделген. Енді оқытушылар мен қызметкерлерді оқыту бағдарламаларын әзірлеу және бірлескен ғылыми-практикалық конференциялар, семинарлар, байқаулар, олимпиадалар және басқа іс-шаралар өткізу қарастырылған.
