Қазақ Елі- Тарихи Отанын аңсаған әлемдегі қазақ қандастарымыздың ең үлкен арманы. Жыл сайын Атамекеніне көптеген қандасымыз келіп жатады, солардың бір легі Қазақстанның бірқатар жоғары оқу орындарына келіп, дайындық курсынан білім алатын жастар. Солардың біразы М.Қозыбаев атындағы Солтүстік Қазақстан университетінің «Foundation» факультетіне Қытай, Моңғолия, Өзбекстан сияқты елдерден келіп, білімдерін шыңдап, арқалаған армандарына қол жеткізу мақсатында келген тыңдаушыларымыз. Дүниежүзі қазақтар қауымдастығы Солтүстік Қазақстан облыстық филиалы және «Отандастар Қоры» КЕАҚ Қытайдан келген 11 тыңдаушымызға ерекше қамқорлық танытып, олардың Қазақстан азаматтығын алуларына қолдау көрсетіп отыр. Жастарды барлық медициналық байқаудың түрлерінен өтуге көмектесті. Халыққа қызмет көрсету орталығына барып оралман куәліктерін алуға, тұрақты тіркеуге тұруға қол ұшын берді. Кейіннен барлық балалардың құжаттарын дұрыстап Петропавл қалалық көші-қон полиция басқармасына өткізіп, ықтияр хатқа тапсырыс беруге жәрдемдесті. Бұл процесті жүзеге асыруды жеделдету үшін көлікпен де қамтамасыз етті. Қандас жастарды қолдап, көмек көрсеткен аталмыш қауымдастықтың СҚО филиалына алғыс білдіреміз! Бұл қолдау- бірден-бір және алғашқы қамқорлықтары емес, бұған дейін де көптеген игі істер атқарылып келеді. Осы орайда СҚО Петропавл қаласы ХҚКО мамандарына, медициналық мекемелер мамандарына, Көші-Қон қызметі орталығының мамандарына да алғыс білдіреміз. Бұл қандас жастарымыз қазіргі таңда университетіміздің мемлекеттік грант иегерлері болып отыр. Бүгінгі күні шеттен келген бауырларымыз толығымен қамқорлықта десек, артық айтқандық емес.
