М. Қозыбаев атындағы СҚУ Foundation факультетінде шет елден келіп білім алатын ҚР азаматтары болып табылмайтын тұлғалар білім алатыны баршаңызға мәлім. Жылда ҚХР, Моңғолия, Өзбекстан сынды елдерден көптеген қандас жастар келіп 9 ай ҰБТ—ке дайындалып, ортаға бейімделіп, ҚР БжҒМ—нің білім гранттарын жеңіп алып Студент атанып жатады. Аталмыш жастардың көбі өнерлі, талантты, дарынды болып келеді. Шет елден келсе де ана тілдері — қазақ тілін, салт—дәстүрді жетік біледі. Осы орайда таланттытыңдаушы айдары арқылы өнерлі жастарды парашқамызда таныстыруды жөн көрдік.
Қарғынбайұлы Айбол— ҚХР, Шыңжан, Іле Қазақ автономиялық облысы, Моңғолкүре ауданы, Қасшар ауылында 1994 жылы 15 мамырда қарапайым диханшы отбасында дүниеге келген. Бала кезінен сурет салуға, ән айтуға, спортқа жақын болып өседі. 2010 жылы орта мектепті аяқтап, 2010—2015 жж. аралығында Іле кәсіптік техникалық университетінде оқып, мамандығы бойынша аз уақыт жұмыс жасайды. 2020—2021 оқу жылында Атамекені—Қазақ еліне келіп білім алу арманын жүзеге асыру мақсатында Петропавл қаласы М. Қозыбаев атындағы СҚУ Foundation факультетіне оқуға түседі. Қазіргі таңда ҚХР—да отырып қашықтықтан білім алып жатыр.
Айбол суретшілік өнерді арнайы оқып үйренбеген, тума талант. Қылқаламынан керемет туындылар шығады. Техникасы— май бояумен сурет салу. Ағашқа бейнені ойып сурет салу да өнері бар. Факультетімізге тыңдаушы болған алғашқы аптада Ұстаздар күнінің құрметіне университетіміздің бас оқу ғимаратының бейнесін ағашқа ойып сала бастаған екен, "Мен ҚР—на баратын күнімді асыға күтіп жүрмін, сол кезде университетіме арнайы барып табыстаймын, аяқтадым" —деген сонау Қытайдан бейнежазбасын жолдады.
Айболдың арманы— Қазақ еліне келіп, өнерін дамытып білім алу!
