Қозыбаев университетінде "Жастар және ғылым– 2021" халықаралық ғылыми-практикалық конференциясына 230-дан астам мақала келіп түсті. Биылғы жылы дәстүрлі конференция онлайн режимде өз жалғасын тапты. Аталмыш конференцияда гуманитарлық, техникалық, ауылшаруашылық, жаратылыстану ғылымдары, педагогика, психология, экономика, құқық, тарих және журналистика, сондай-ақ математика саласындағы жаңа технологиялар талқыланды.
Жиынды университеттің ҒжИ жөніндегі Басқарма мүшесінің м.а. Ақмарал Ыбыраева құттықтау сөзімен бастады. «Жастар қоғамның қозғаушы күші, бүгінгі күні көп нәрсе сіздердің қолдарыңызда, сіздерге зор мүмкіндіктер ашылып отыр. Ғылымның болашағы жастардың қолында», деп атап өтті.
Осы жолы білім алушылардың зерттеу қызметін жақсартуға ықпал ету үшін ұйымдастырылып отырған конференцияға Қазақстан, Түркия, Өзбекстан, Қытай, Венгрия, Ресей және басқа да елдердің ірі ғылыми және білім беру мекемелерінің студенттері қатысты. Студенттер, магистранттар, аспиранттар, докторанттар мен жас ғалымдар өзекті баяндамалары мен жобаларын ұсынды.
Университет қабырғасындағы әрбір жастың көкейінде ғылымға деген қызығушылық тудыру үшін, бастапқы талпыныс ретінде ұйымдастырылатын бұл жобаға барлық факультет белсене қатысуға тырысады. Атап өткен жөн, конференция қатысушылары ғылым мен техниканың дамуына байланысты өзекті мәселелерге кеңінен тоқталды. "Жастар және ғылым-2021" конференциясының қорытындысы бойынша ғылыми мақалалар жинағы шығарылады.
