Қазақстан Республикасы Тәуелсіздігінің 30 жылдығына арналған «Тәуелсіздік ұрпағы» тақырыбында парламенттік бағыт бойынша облыстық пікірсайыс турнирі өткізілді. Бұл іс-шара СҚО әкімдігінің ішкі саясат басқармасының қолдауымен ұйымдастырылды.
Пікірсайыс алаңына 4 аудан, 6 мектеп және колледж студенттері жиналды. 8 команда қазақ тілді , ал 12 команда орыс тілді лигада сайысқа түсті. Ойында бүгінгі күннің өзекті мәселесіне айналған қашықтан білім беру жүйесі, сыбайлас жемқорлық пен есірткі саудасының таралуы және саламатты өмір салты тақырыптары қозғалды.
Қатысушылар дүниежүзілік турнирлердің Британдық парлементтік формат бойынша пікір сайыстырып, ақтық кезең үшін жарысты. Қатысушылар 3 кезең бойынша бақтарын сынады. Сөз шешндері түрлі тақырыпта өзіндік жеке пікірлерін білдіріп, көзқарастарын сенімді қорғай алды. Халқымыздың «Білікті бірді, білімді мыңды жығады» деген ұлағатты сөзі білімнің рухани қару екендігін осындай ойындардан түсінуге болады.
«Бұл турнир дәстүрлі түрде өткізіліп келеді. Бүгінгі пікірсайыс БПФ форматында өтті. Турнирге мектеп оқушыларының қатысып жатқандықтары қуантады. Пікірсайыста командалар өз көзқарастарын дәлелдеп, барынша қорғап шығуы керек. Сәйкесінше бұл олардың қарсыластарын әлдеқайда озып шығуға жақсы мүмкіндік», – дейді турнир ұйымдастырушылары.
Нәтижесінде 20 команданың ішінен суырылып шыққан үздік топтар көпшілік алдында толғамды тұжырымдарын дәлелдеп, ерекше көзге түсті. Орыс лигасы бойынша 1 орынды Қозыбаев университетінің «Cerebrum» командасы, студенттері , 2 орынды БЭСТ гимназиясының «Aurora» командасының оқушылары , 3 орынды № 8 орта мектеп эстетикалық тәрбие беру кешені «Философия мысли» командасының қатысушылары иеленді.
Ал қазақ лигасы бойынша нақты фактілерді келтіре отырып, ой жүйріктігін көрсете білген № 25 мектебінің «25-ші мектеп шәкірттері» командасы 1 орынды жеңіп алды. Мамлют ауданы, Бексейіт орта мектебінің «Жас қырандар» командасы 2 орынға, және Шал ақын ауданы, Кеңес орта мектебінің «Кеңес қырандары» командасының оқушылары 3 орынға жайғасты.
