Аризона университетінің делегациясы жұмыс сапарымен Солтүстік Қазақстан облысына келді. Іс-сапары барысында Аризона университетінің өкілдері облыстағы бірқатар нысандарды аралап, Қозыбаев университетінде де болып қайтты. Аризона университетінің президенті Роберт Роббинс, Аризона штатының конгресс төрағасы Расселл Бауэрс, университетінің академиялық мәселелер бойынша аға вице-президенті және проректоры Лизл Фолкс, университетінің жаһандық мәселелер жөніндегі проректоры, жаһандық зерттеулер мектебінің деканы және заң профессоры Брент Уайт, CSI Group аға серіктесі Олжас Құдайбергенов – 11 қабатты жаңа оқу ғимаратының құрылыс барысымен танысты. Оған ең жаңа технологиялармен жабдықталған 70-тен астам зертхана кіреді. Мұнда ең алдымен Медицина Жоғары мектебінің, Инженерлік және цифрлық технологиялар факультетінің және Агротехнология факультетінің студенттері білім алады. Өз кезегінде оқу ордамыздың білімгерлері қабілеттері мен алған білімдерін тәжірибе жүзінде ұштастыра алады. Олар заманауи қондырғылар арқылы практикалық білімдерін жетілдірмек. Бұл болашақ білікті мамандар үшін аса маңызды.
Сондай-ақ, делегация мүшелері университеттің оқытушылар құрамымен кездесті, онда Қозыбаев университетінің жұмысының негізгі бағыттары талқыланды. Ал, академиялық сауалдар жөніндегі Басқарма мүшесінің м.а. Жанар Таласпаева университетіміздегі жүзеге асырылып жатқан бағдарламалар туралы және әр факультетке жеке тоқталып, жетістіктерін атап өтті. Сонымен қатар, университеттің ғылыми қызметін дамыту жоспарларымен де бөлісті.
Шет елдік қонақтар өз кезегінде, алдағы уақытта Қозыбаев университетімен бірлесе жұмыс атқаруға ниет білдіретіндіктерін, екі жақтық ынтымақтастық студенттер мен оқытушылар үшін үлкен мүмкіндіктер беретіндіктерін атап өтті.
