Қозыбаев университетінің қабырғасында айтулы датаға орай салтанатты іс-шара ұйымдастырылды. Жиынға бірқатар атақты тұлғалар мен ғалымдар, зерттеушілер, мұрағатшылар, сондай-ақ, қоғам қайраткерлері мен ардагерлер, профессорлар қатысты. Салтанатты жиын барысында СҚО әкімінің орынбасары Ғани Нығыметов, академиялық сауалдар жөніндегі басқарма мүшесінің м.а. Жанар Таласпаева сөз сөйлеп, жоғарғы оқу орнының ұжымын, кездесуге жиналған қонақтарды мерейтоймен құттықтады.
Тарихқа үңілетін болсақ, 85 жыл бұрын, сонау 1936 жылы Солтүстік Қазақстан облысы құрылған болатын. Өңірдің бірінші басшысы ретінде Максим Кирович Аммосов тағайындалды. Одан бері талай жылдар өтіп, бірқатар өзгерістер орын алып жатыр. Дегенмен бейбітшілікке қол жеткізген елдің тәуелсіз азаматтары өлкенің көркейіп, гүлденген шағының куәсі болды.
Конференцияға жиылған ғалымдар облысымыздың өткен күндеріне көз жүгіртіп, туған елдеріне адал еңбек еткен тұлғалар жайында сөз қозғап, бірқатар баяндамаларын ұсынды.
Бүгінгі күнге дейін сақталып келе жатқан мұрағаттар халық естелігіне айналғандықтан, тарихи құжаттар мен деректерді сақтап, жинақтау аса маңызды. Бұл өткенді бағалап, қазіргі кезді саралап, келешекті жоспарлауға мүмкіндік беретін бай мұра. Жиынның негізгі мақсаты – еліміздің, облысымыздың тарихын, сыртқы саясатын одан әрі зерттеп, зерделеу.
Академиялық сауалдар жөніндегі Басқарма мүшесінің м.а. Жанар Таласпаева атап өткендей, 1936 жылғы 29 шілдеде құрылған өңіріміздің 85 жылдық үлкен тарихы туған жеріне туын тіккен тұлғалар үшін, өскелең жас ұрпаққа өнеге болып қалмақ.
Өңіріміздің даму кезеңі туралы СҚО мемлекеттік мұрағатының директоры Сәуле Мәлікова да естеліктерімен бөлісті. Облыстың 85 жылдық тарихының басты оқиғалары баспа беттерінде де жарияланған. Қазіргі таңда СҚО бағындырған белес, жетістіктерімен ғана емес, оны көргейтуге атсалысқан азаматтарымен де мақтана алады. Жыл санап өңірде түрлі зауыт, кәсіпорындар мен әлеуметтік маңызы бар нысандар бой көтеріп келеді.
