Қозыбаев университетіне ҚР Парламенті Мәжілісінің депутаты Жұлдыз Сүлейменованың төрағалығымен "Nur Otan" партиясы жанындағы білім мен ғылымды дамыту жөніндегі республикалық қоғамдық кеңестің көшпелі отырысы өтті. Кездесуде өңірдегі орта және жоғары білім беруді дамыту мәселелері талқыланды. СҚО Білім басқармасының басшысы Гүлмира Кәрімова кеңеске қатысушылармен мектептердің құрылысы мен жаңғыртылуы, сондай-ақ, "Жас маман" жобасының іске асырылу қарқынымен бөлісті.
Кеңес барысында Басқарма төрағасы-Ректор Ерлан Шуланов "Серпін" бағдарламасын жүзеге асырудың тиімділігі, Nazarbayev University моделі арқылы университетті жетілдіру және жаңа мектептер мен ЖОО үшін жоғары білікті педагогикалық кадрларды даярлау туралы сөз қозғады.
"Солтүстік Қазақстан облысында күн тәртібіндегі маңызды мәселелердің бірі-ауылдық, жалпы білім беретін мектептердің құрылысы мен жаңғыртылуы. Ол үшін барынша жоғары білікті жас мамандарды дайындау талап етіледі", - деп атап өтті ҚР Парламенті Мәжілісінің депутаты Жұлдыз Сүлейменова
Сондай-ақ, университеттің профессорлық-оқытушылық құрамымен кездесу өтті, онда біздің ғалымдар Парламент Мәжілісінің депутатына өздерін толғандырған сұрақтарын қойып, нақты жауаптар алды. Оқытушыларды "Серпін" бағдарламасы бойынша білім алып жатқан студенттердің оқу жүйесі мәселесі де қызықтырды. Биыл 25 білім беру бағдарламасы бойынша 300 студент оқуын аяқтамақ. Студенттер ЖОО тәмамдаған соң, «СLAAS» компаниясына, Петропавл электротехникалық зауытына және т.б. кәсіпорындарға еш кедергісіз жұмысқа орналасады. Мәселен, 2020 жылы олардың жұмысқа орналасу деңгейі 90% құрады.
Өңірімізде болып қайтқан мәжіліс депутаты Жұлдыз Сүлейменова бастаған жұмыс тобы жаңа 11 қабатты оқу-зертханалық корпустың құрылыс барысымен танысты. Аталмыш заманауи ғимаратта заманға сай ең қажетті мамандық иелері даярланбақ. Ал, бұл шекаралас ресейлік немесе шетелдік университеттерге қарағанда, жергілікті ЖОО таудауға зор үлесін қоспақ. Жалпы, делегация Kozybayev University-де өткізілген жұмысқа оң баға беріп, ЖОО-ның ғылыми-зерттеу қызметін одан әрі дамытуға қолдау білдірді.
