Әл-Фараби атындағы ҚазҰУ, Тарих факультеті т.ғ.д., профессоры Х.Хабиев атындағы Қоғамдық қор қолдауымен 2022 жыдың 4-7 сәуір аралығында дәстүрлі «Фараби әлемі» атты студенттер мен жас ғалымдардың халықаралық ғылыми конференциясы аясында республикалық байқау өткізді.
Байқаудың басты мақсаты – жаңаша ойлайтын жас буын арасында Отан тарихының өзекті мәселелерін әлемдік өркениет деңгейінде зерделеу, ұлттық тарихымызды, мәдениетімізді және өркениетімізді дәріптеу болатын. Байқау тақырыбы «Есік» – «Иссык»; «Түркілер – әлемдік тарихта» атты екі бағытта ұйымдастырылған. Тарихи, мәдени, философиялық, лингвистикалық, құқықтық, әлеуметтанулық, экономикалық, саяси, өнертанушылық бағыттағы креативті, бірегей ғылыми жобалар, видеоконтент, презентация, эссе тағы да басқа шығармашылық ізденістерінің додасы болды.
Екінші бағыт бойынша біздің универсиеттің «Журналистика» және «Қазақстан тарихы және әлеуметтік-гуманитарлық пәндер» кафедраларының студенттері қатысып, жүлделі үшінші орынды қанжығаларына байлап қайтты. Олар ұсынған тақырып – «Қызыл оба – түрік әлемінің ажырамас бөлігі». Тақырыпты ғылыми тұрғыда ұсынғандар: Әміре Ақбатай, Наталья Халина, Білімбекұлы Бақытбек. Олардың бұл тақырыпты таңдауының басты себебі – «Қызыл-оба» қорымындағы зерттеу жұмыстарына біздің универсиеттің қатысатындығы. Ғылыми жобаға жетекшілік еткен оқытушылар, «Қазақстан тарихы және әлеуметтік-гуманитарлық пәндер» кафедрасының оқытушысы Орал Құсайнов мен «Журналистика» кафедрасының оқытушысы Гүлгүл Төлешева еңбегі ақталды.
Байқау іріктеу және қорғау кезеңінен тұрды. Біздің студенттер іріктеу кезеңінен сүрінбей өтіп, еліміздің бас универсиеті саналатын Әл-Фараби атындағы ҚазҰУ-ға барып, сәтті қорғады. Сондай-ақ байқауды ұйымдастырушылар «ҚазҰУ кампусы бойынша экскурсия», Алматының керемет орындарына, «Есік» мемлекеттік тарихи-мәдени музей-қорығына, «Таңбалы» мемлекеттік тарихи-мәдени және табиғи қорық музейіне тегін турлар ұйымдастырды.
Жеңімпаздарымызды жеңістерімен құттықтаймыз! Алар асулары көп болсын!