Халықаралық студенттер күніне орай Қозыбаев білім алушылары арасында спартакиада өтті. Құрамалар волейбол және тоғызқұмалақ спорт түрлерінен өзара бақ сынасты. Екі күн ішінде әр факультеттердің және Халықаралық кампустың спортшылары ойын шеберліктерін көрсетті. Тоғызқұмалақтан командалық нәтижелері: 1-орын: ПФ 2-орын: ТжӘИ 3-орын: ТЭҚФ Жеке есепте жеңімпаздар: Әуелбай Ерсұлтан (ФКС-м-25 тобы) және Елубаева Саида (НОИП (KZ-US)-23-k тобы). Ұлдар арасындағы волейбол жарысына 8 факультет командасы қатысып, Педагогикалық факультет жеңіске жетті. ИСТФ күміс медальдарды жеңіп алды. Ал АФ үшінші орынды иеленді. ПФ студенті Павел Сороколадов турнирдің ең үздік ойыншысы атанды. ИСТ факультетінің білім алушысы Алан Калипенов ең үздік шабуылшы атағын жеңіп алды, ал Агротехнологиялық факультеттің студенті Әділ Оспанов ең үздік қорғаушы-шабуылшы атағына ие болды. Оларға естелік сыйлықтар табысталды. Ойындар тартысты өтіп,ал көрермендер өз құрамаларын қызу қолдап отырды. Спартакиада студенттерге спорттық қабілеттерін көрсетуге мүмкіндік береді және факультет аралық байланыстарды нығайтады. Барлық белсенді қатысушыларды құттықтаймыз!

Университетте сапа апталығы аяқталды. Биыл ол «Жасанды интеллект: мүмкіндіктер, сын-қатерлері және болашақ білім сапасы» атты өзекті мәселеге арналды. Іс-шара аясында университетте қазақ, орыс және ағылшын тілдерінде оффлайн және онлайн режимінде дөңгелек үстел, викториналар, пікірталастар, семинарлар, конференциялар шамамен 30 іс-шара өткізілді. Қатысушылар арасында тек университетіміздің студенттері мен оқытушылары ғана емес, сонымен қатар СҚО жұмыс берушілері мен серіктестері, Омбы мемлекеттік педагогикалық университетінің (Ресей) ғалымдары және ҚР Ұлттық ұлан академиясының курсанттары да болды . Жасанды интеллект бойынша білім беру әдістеріне, зерттеу жобаларына және жасанды интеллект құралдарын пайдалануға ерекше назар аударылды. Студенттер шеберлік сабақтары мен ашық практикалық жаттығулар арқылы кәсіби дағдыларын шыңдады. Сондай-ақ, білім алушылар «Жаратылыстану ғылымдарының дамуындағы заманауи үрдістер» атты ғылыми мақалалар көрмесіне қызығушылық танытты.

Ұлт ұстазы -Ахмет Байтұрсынұлының туған күні мен Қазақстан халқының тілдері күні аясында ҚР ҒЖБМ және «Халықаралық «Қазақ тілі» қоғамы» ҚБ бірлесіп «Ұлттық диктант» жобасын бастады. Игі бастаманы қолдау мақсатында Қозыбаев университетінің оқытушылары, қызметкерлері мен студенттері жалпыұлттық диктант жазуға қатысып, қазақ тілінен жазу сауаттылығын көрсетті. Іс-шара екі бағытта өткізілді: ана тілі ретінде қазақ тілін меңгерген қатысушыларға Ахмет Байтұрсынұлының «Оқу жайы» мақаласынан үзінді және қазақ тілін екінші тіл ретінде меңгерушілерге «Отан» тақырыбындағы шағын шығарма пайдаланылды. Жаппай диктант жазуға барлығы 1000-нан аса адам қатысты. Қатысушылар мемлекеттік тілді меңгеру деңгейін тексеріп қана қоймай, оның мәртебесін арттыруға және ұлттық бірегейлік пен тілдік мәдениетті нығайтуға ат салысты. Мұндай дәстүрлі диктант жазу шаралары жастардың тіл мәдениетін жетілдіріп, мемлекеттік тілде сауатты жазу дағдысын қалыптастырады.

Қытай Халық Республикасының Қазақстандағы Елшілігінде «Солтүстік Қазақстан облысы-Қытай» атты алғашқы инвестициялық бизнес-форум өтті. Іс-шара екі елдің билік, бизнес және ғылыми қоғамдастық өкілдерін біріктіріп, тәжірибе алмасудың және серіктестік байланыстарды нығайтудың маңызды алаңына айналды. Форумға Қозыбаев университетінің Басқарма Төрағасы-Ректоры және Агротехнологиялық факультеттің деканы қатысты. Ербол Исақаев біздің ЖОО-ның солтүстік-батыс ауыл және орман шаруашылығы университетімен (ҚХР) сегіз жылдық ынтымақтастығының нәтижелері туралы айтып, академиялық және ғылыми тұрғыдан қол жеткізілген жетістіктерді атап өтті: бірлескен білім беру бағдарламаларын, ғылыми жобаларды және оқытушылар мен студенттер арасындағы алмасу шараларын жүзеге асыру. Серіктестіктің жаңа бастамасы Қозыбаев университетінің базасында Хэнань ауыл шаруашылығы инвестициялық тобымен бірлесіп, Қазақстан-Қытай ғылыми аграрлық орталығын құру болмақ. Орталықтың жұмысы қолданбалы зерттеулерді дамыту, инновациялық технологияларды енгізу және аграрлық саладағы ғылыми әзірлемелерді коммерцияландыру үшін бағытталады. Мұндай халықаралық форумдар ғылымды экономиканың нақты секторына ілгерілетуге ықпал етеді, тұрақты серіктестіктерді дамытады және бірлескен жобалар үшін жаңа мүмкіндіктер жасайды. Университетті ресми делегация құрамына қосып, өңірдің ғылыми-білім беру ынтымақтастығы мен халықаралық интеграциясын дамытуға бағытталған бастамаларға қолдау көрсеткені үшін Солтүстік Қазақстан облысы әкімдігіне алғысымызды білдіреміз.

Университетте Дүниежүзілік Сапа күніне арналған сапа апталығы басталды. Бұл күн жыл сайын қарашада Еуропалық сапа ұйымының бастамасымен және БҰҰ қолдауымен атап өтіледі. Әлемнің көптеген мемлекеттерінде азаматтардың лайықты өмірін және елдердің тұрақты дамуын қамтамасыз ету үшін өнімдер мен қызметтердің, сондай-ақ әлеуметтік және бизнес басқарудың маңыздылығын атап өтуге бағытталған іс-шаралар ұйымдастырылады. Біздің университет бұл дәстүрді 2005 жылдан бері жалғастырып келеді. 2008 жылдан бастап әрбір сапа апталығы қазіргі заманғы мәселелерді көтеретін нақты тақырып аясында өткізіледі. Биылғы жылы сапа апталығының негізгі тақырыбы жасанды интеллект: мүмкіндіктері,сын-қатерлері және болашақ білім сапасы болып табылады. Университетте жасанды интеллектті енгізу, Қазақстан үшін стратегиялық тұрғыдан үлкен маңызға ие. Мемлекет басшысы атап өткендей, елдің академиялық жүйесінде заманауи цифрлық технологиялар мен жасанды интеллект жүйелерін енгізу арқылы білім берудің жаңа буынын құруға бағытталған қадам болмақ. ЖОО үшін жасанды интеллект технологияларымен жұмыс істей алатын және жаңа нарықтар мен трансформацияларға бейімделе алатын мамандарды шығару маңызды. Сапа апталығы аясында алғашқы іс-шаралардың бірі «Жаратылыстану ғылымдары саласындағы зерттеулерде жасанды интеллектіні пайдалану мүмкіндіктері» атты ғылыми-тәжірибелік конференция өтті. 10-14 қараша аралығында университеттің барлық факультеттерінде дөңгелек үстелдер, семинарлар, шеберлік сабақтары, көрмелер және басқа да іс-шаралар жоспарланған. Сапа апталығының іс-шараларына қатысыңыз! Дағдыларыңызды жетілдіріп, біліміңізді кеңейтіңіз!

Қозыбаев университетінде ҚР Премьер-Министрінің кеңесшісі Ералы Тоғжанов және  запастағы генерал-лейтенант, профессор Абай Тасболатов болды. Олар «Мәңгілік Ел Жастары-Индустрияға!» «Серпін-2050» бағдарламасының студенттері, түлектерімен, оқу ордамызда білім алып жатқан оңтүстік-батыс өңірлерден келген студенттермен кездесті. «Серпін» бағдарламасы Солтүстік Қазақстан облысында 2014 жылдан бері жұмыс істейді. Осы уақыт ішінде Алматы, Жамбыл, Түркістан, Қызылорда, Маңғыстау және Жетісу облыстарынан 1417 студент Қозыбаев университетінде оқуын аяқтады. 456 түлек жұмысқа орналасты, олардың 84%-ы СҚ кәсіпорындарында қызмет жасайды. Қазір бағдарлама бойынша 150-ден астам студент оқиды. Білім алушылар өздерінің жоспарларымен бөлісіп, стартап-жобаларын ұсынды. «Бұрын мектеп бітірген оқушылар шетелге оқуға кететін. Кейін Аризона университетімен серіктестік орнаған жылы шамамен 64%-ы осында  оқуларын жалғастыру үшін елімізде қалды. Солтүстік аймаққа сіздер сияқты мықты білімі бар жас мамандар қажет. Болашақта оқуларыңды аяқтаған соң, өңірді өркендетіп, дамытып, осында қалып жұмыс істеуге тырысу қажет »,- деді Премьер-Министрдің кеңесшісі Ералы Тоғжанов. 2024 жылы университетте барлық тиісті мемлекеттік органдарды біріктіретін Serpin Qoldau аймақтық жобалық кеңсесі құрылды. Ол бейіндік оқытуды, біліктілікті арттыруды, тілдік курстарды, психологиялық бейімделу бағдарламаларын және мәдени интеграцияны қамтамасыз етеді. Үшінші және төртінші курс студенттері дуалды оқытуға жіберіледі және жеке еңбек шартына қол қойғанға дейін үздіксіз қолдау табады. Жұмысқа орналасуды жеңілдету үшін СҚО ең ірі кәсіпорындармен меморандум жасалды. Қазіргі уақытта бағдарламаның түлектері жатақханада уақытша тұрғын үймен қамтамасыз етіледі. Еліміздің оңтүстік аймақтарындағы мектеп түлектеріне кәсіптік бағдар беру үшін 6 мың шақырым қашықтықты жүріп өткен Serpin Way керуені ұйымдастырылды. Басқарма Төрағасы-Ректор Ербол Исақаев, Премьер-Министрдің кеңесшісін Қозыбаев университетінің дамуы, Аризона университетімен стратегиялық серіктестікті жүзеге асыру және осы ынтымақтастық аясында университетте жүзеге асырылып жатқан флагмандық ғылыми-зерттеу жобаларымен таныстырды. «Мемлекеттік қолдаудың арқасында биыл бізге шамамен 3 миллиард теңге көлемінде БМҚ мегагрант берілді. Оның 1,25 миллиард теңгесі Солтүстік Қазақстан кәсіпорындарынан тартылған бірлескен қаржыландырудан түседі. Жоба судың сапасына, суаруға, тазартуға және су ресурстарын тиімді пайдалануға бағытталған. Біз бұл жобаны 1 қазанда іске асыра бастадық. Аризона университетімен бірлесіп жүзеге асырылып жатқан тағы бір инновациялық жоба күкіртті полимерлеуді және оны жоғары технологиялық тыңайтқыштарға өңдеуді, бағалы металдарды өндіруде күкіртті пайдалануды қамтиды. Ол Мемлекет басшысына Стратегиялық серіктестер форумында ұсынылды»,- деді Ербол Исақаев.

Qyzyljar Creative Center алаңында бірқатар IT, креативті жобалар, студенттер мен оқушылардың стартаптары, білім беру платформалары, сондай-ақ қолданыстағы цифрлық өнімдер таныстырылды. Олардың ішінде Қозыбаев университетінің Жасанды интеллект және цифрлық трансформация орталығы бар. Оның басты мақсаты – әлеуметтік салаларды, экономика мен бизнесті дамыту үшін процестерді автоматтандыру болып табылады. «3 қарашада ашылғанымызға қарамастан, жүзеге асырылып жатқан 8 жобамыз бар. Мәселен,  студенттер мен оқытушылардың корпустар арасында оңай қозғалуы үшін кесте құру процесін автоматтандыру жобасы болмақ. Тағы бір жоба – өтініштерді автоматтандыруға арналған AI-ticket. Сондай - ақ, Аризона студенттерімен бірге біз ЖИ көмегімен Raduga компаниясының деректерін іріктеу негізінде өнім ақауларын автоматтандырылған анықтауды қалыптастырамыз», - деді ЖИ және CT орталығының директоры Гүлнара Ким. Сондай-ақ, форумда Басқарма Төрағасы-Ректор Ербол Исақаев сөз сөйледі. Ол бүгінде еліміздің цифрлық экожүйесінде университеттердің рөлін, құзыреттілік алаңдар мен инновациялар орталығына айналатынын атап өтті. Қозыбаев университеті  жаңа буын мамандарын даярлау және ЖИ-ді білім беру, басқару және бизнес-процестерге интеграциялау бойынша жүйелі жұмыс жүргізеді. Қазіргі уақытта IT бағдарламаларында 659 студент, оның ішінде 190 - ы Аризона университетімен қос дипломды бағдарлама бойынша білім алады. Оның ішінде АҚШ-та 22 студент оқиды. Осы оқу жылында студенттер төмендегідей жобаларды жүзеге асырады: 1. Радуга кәсіпорны үшін өндірістік деректер мен ML-талдауларға негізделген өнім ақауларын автоматты түрде анықтау жүйесін әзірлеу; 2. Жіктеу алгоритмдерін қолдана отырып, жүрек-қан тамырлары ауруларының қаупін бағалаудың диагностикалық моделін жасау; 3. Білім беру көрсеткіштері негізінде студенттердің академиялық табыстылығын болжаудың IT-жүйесін әзірлеу. «Қозыбаев университеті жасанды интеллектті дамыту жөніндегі ұлттық жоба-AI Sana бағдарламасын іске асыру бойынша елдің алдыңғы қатарлы жоғары оқу орнына айналды. Бүгінде ол үздік 10 ЖОО-ға кіреді және Huawei, Coursera, Astana Hub платформаларында ЖИ арқылы базалық курстарды аяқтаған студенттер саны бойынша елімізде алдыңғы қатарда тұр. 11000-нан астам сертификат алынды; білім беруді, көлікті, медицинаны және ішкі аналитиканы дамыту үшін 5 ЖИ агенттері құрылды. Бұл жобалар университет пен өңірдің цифрлық экожүйесіне енгізіледі», - деді Ербол Исақаев. ЖОО-да KU AI School-жасанды интеллект мектебі іске қосылады, онда студенттер мен жоғары сынып оқушылары машиналық оқыту дағдыларын, нейрожелілерді веб-әзірлеу мен интеграциялауды меңгереді. Мұндай оқытудың нәтижесі өзіңіздің интеллектуалды қосымшаңызды құруға мүмкіндік береді. Бүгінде Қозыбаев университеті кадрларды дайындап қана қоймайды. Университет жергілікті атқарушы органдар, бизнес және ғылым синергиясының орталығы болып табылатын аймақтық AI экожүйесін құрып жатырмыз. Болашақта ел деңгейіне көтерілетін нәтижелі шешімдер пайда болады

Басқарма Төрағасы-Ректордың Қытай мен Польшадан келген шетелдік ғалымдармен кездесуінде жоғары білім беруді интернационалдандыру, бірлескен ғылыми қызмет және өңірдің аграрлық секторы үшін өзекті тақырыптарды дамыту мәселелері талқыланды. «Шетелдік ғалым»бағдарламасы аясында Агротехнологиялық факультетінде екі шетелдік профессор жұмыс жүргізеді. Ян Юсин – PhD докторы, ҚХР солтүстік-батыс ауыл және орман шаруашылығы университетінің Жануарлар ғылымы және технологиясы колледжінің доценті -біздің университетте 13 қазан мен 9 қараша аралығында тұрақтайды. Осы уақыт ішінде Ян Юсин : кафедра ғалымдарымен бірлесіп Food Chemistry халықаралық ғылыми журналына мақала дайындап, жолдады; АФ оқытушыларына арналған семинарлар және студенттер мен магистранттарға арналған дәріс сабақтарын өткізді; ПОҚ үшін біліктілікті арттыру курстарын ұйымдастырды. Познань жаратылыстану ғылымдары университетінің (PULS) доценті Аркадиуш Садовский қараша айының соңына дейін университетте болады. Ол студенттермен дәріс және практикалық сабақтар, оқытушыларға арналған семинарлар өткізеді, АФ ғалымдарымен бірлесіп ғылыми мақала дайындау бойынша жұмыс істейді. Екі шетелдік ғалым да өңірдің мал шаруашылығы кәсіпорындарына - ЖОО-ның серіктестеріне барды. «Сізді университет қабырғасында қарсы алу біз үшін үлкен мәртебе . Біз 2017 жылдан бері Қытайдың солтүстік-батыс ауыл және орман шаруашылығы университетімен стратегиялық серіктестік орнаттық. Мал шаруашылығы және Өсімдік шаруашылығы бойынша ғылыми зерттеулер саласында өте тығыз жұмыс жүргіземіз. Бірлескен зертханалар ашылды. Сондай-ақ, біздің студенттер жыл сайын тәжірибе мен тағылымдамалардан өтетін  Польшаның агроөнеркәсіптік кешендерімен  сенімді байланыс орнатылды. Дәл қазір біздің екі білім алушымыз Польшада. Бірлескен жұмысты одан әрі дамытуға, ғылыми жобаларды жүргізуге дайынбыз», - деді Ербол Исақаев . Ян Юсин өз кезегінде Қозыбаев университетінде академиялық ұтқырлық бойынша оқитын қытайлық студенттерге қолдау көрсеткені үшін университет басшылығына алғысын білдірді. Қазір бізде ҚХР-дан 29 білім алушы бар. «Біз үлкен бірлескен жұмыс жасаймыз: үшінші жыл қатарынан Қытайдан студенттер мен магистранттар сіздің ЖОО-ға келеді. Олар үшін барлық жағдайлар жасалады. Біз сіздің студенттеріңізді үлкен ықыласпен қарсы аламыз. Сондай-ақ қазір ауыл шаруашылығы саласындағы солтүстікқазақстандық үш сарапшы Қытайда ақылы тағылымдамадан өтеді. Солардың бірі- Қозыбаев университетінің оқытушысы болып табылады», - деп атап өтті Ян Юсин

Қаламыздағы жабық кешенде көпсайыстан Қазақстан кубогы өтті. 1-5 қараша аралығында өткен жарысқа университетіміздің спортшылары СҚО командасының құрамында өнер көрсетті. Солтүстік Қазақстан облысының құрамасы жеті медаль жеңді! Ең жақсы нәтижені Қозыбаев университетінің магистранты Никита Изотов көрсетіп, қатысқан жас тобында және Абсолютті біріншілікте екі алтын медаль жеңіп алды. Осылайша, Никита сегізінші рет Қазақстанның ең үздік спортшысы атанды! Дене шынықтыру және спорт кафедрасының аға оқытушысы және топ жаттықтырушысы Наумов Александр Владимирович ардагерлер арасындағы (40 жас және одан жоғары) Абсолютті біріншілікте жеңіске жетіп, 57-ші Қазақстан Чемпионы атанды! Университетіміздің түлектері Жоламан Актари, Юлия Безушко, Ангелина Кудрявцева және Ольга Вернер де турнирде ұлттық құрамада керемет өнер көрсетіп, медальдар жеңіп алды. Үздік спортшыларымызды құттықтаймыз!

Түркістан қаласында қазақ күресінен Әлем кубогы аяқталды.14 елден келген әлемнің ең үздік 100-ге жуық балуаны өзара мықтыны анықтады. Қатысушылар сегіз салмақ дәрежесіне бөлінді Қозыбаев университетінің студенті Дмитрий Динер ұлттық құраманың намысын қорғады. Біздің спортшы төрт жекпе-жек өткізді. Олардың үшеуі жеңіспен және біреуі ғана жеңіліспен аяқталды. Нәтижесінде Дмитрий 82 келіге дейінгі салмақ дәрежесінде қола медаль жеңіп алды. Мұндай беделді турнирдегі көрсеткіш бүкіл аймақ үшін үлкен жетістік және жас спортшылар үшін нағыз үлгі. Білім алушы мен жаттықтырушыларды керемет нәтижелерімен құттықтаймыз!