Қазақстан Республикасы Ғылым және жоғары білім министрлігінің Ғылым және жоғары білім беру саласындағы сапаны қамтамасыз ету комитеті төрағасының бұйрығымен Виталий Тюканькоға «Химиялық ғылымдар» бағыты бойынша қауымдастырылған профессор (доцент) ғылыми атағы берілді. Виталий Юрьевич-Қозыбаев университетінің Математика және жаратылыстану ғылымдары факультетінің «Химия және химиялық технологиялар» кафедрасының аға зерттеушісі, техника ғылымдарының кандидаты, PhD докторы, ҚР ҒЖБМ «Үздік ғылыми қызметкер-2025» сыйлығының иегері. Қазіргі уақытта ол кең ауқымды техникалық өнімдерді өндіру үшін қайта өңделген полиэтилен негізінде айналмалы композиттерді өңдеу технологиясын әзірлеу бойынша гранттық қаржыландырылған жобаны басқарады. Жоба 2025–2027 жылдарға жоспарланған, жалпы құны 120 млн теңгені құрайды және Ядролық физика институтының Астаналық филиалының қатты дене физикасы зертханасымен және Қазақ ұлттық техникалық зерттеу университетімен бірлесіп орындалды.Ұсынылған қайта өңдеу технологиясының өнеркәсіптік сынақтарын «AVAGRO» ЖШС жүргізеді. Виталий Юрьевичке кәсіби жолында жаңа жетістіктер мен биік белестер тілейміз! Сіздің ғылыми қызметіңіз ғылымның дамуына елеулі үлес қосып, өзге ғалымдарды жаңа жетістіктерге шабыттандыра берсін!

Астанада «Университеттердің тұрақты даму мақсаттарын іске асыруға  қосқан үлесі» тақырыбында дөңгелек үстел өтті.  Ел бойынша мемлекеттік органдардың, халықаралық ұйымдардың және жоғары оқу орындарының өкілдері басқосты.Оның жұмысына математика және жаратылыстану ғылымдары факультетінің деканы, Қозыбаев университетінің тұрақты даму жөніндегі үйлестіру тобының мүшесі Анна Корнилова қатысты. Іс-шарада Тұрақты даму мақсаттарын (ТДМ) университеттердің білім беру және ғылыми қызметіне интеграциялаудың, ESG-құзыреттерін дамытудың және тұрақты дамуды қамтамасыз етудегі жоғары оқу орындарының рөлін кеңейтудің өзекті мәселелері талқыланды. Қатысушылар жоғары білім беруді трансформациялаудың негізгі бағыттарын талқылады: университеттерді басқаруға тұрақты даму қағидаттарын енгізу, ғылыми зерттеулерді жетілдіру, болашақ құзыреттерін қалыптастыру, студенттердің рөлін күшейту, инклюзивті орта құру, сондай-ақ серіктестіктерді кеңейту және адами капиталды дамыту. Талқылау қорытындысы бойынша университеттердің тұрақты даму мақсаттарына бағытталған практикалық ұсынымдар әзірленді. Университет өкілдерінің осындай іс-шараларға қатысуы тәжірибе алмасуға, ЖОО арасындағы халықаралық ынтымақтастықты нығайтуға, оқу ордамыздың білім беру және ғылыми қызметіне орнықты дамудың заманауи тәсілдерін енгізуге ықпал етеді.

Жоғары оқу орнында тәуелсіз аккредиттеу және рейтинг агенттігінің (IAAR) сыртқы сараптамалық комиссиясы жұмысын бастады. Сапар 14-16 сәуір аралығында білім беру бағдарламаларын мамандандырылған аккредиттеу шеңберінде өтеді. Үш күн ішінде сарапшылар бағдарламаларды іске асыру сапасына, оқу-әдістемелік қолдау мен ғылыми-зерттеу қызметіне, университеттің материалдық-техникалық базасына кешенді бағалау жүргізеді. Мамандандырылған аккредиттеуден төмендегідей бағдарламалар өтеді: «Агрономия», «Орман ресурстары және орман шаруашылығы», «Биология», «Шет тілі: екі шет тілі», «Орыс тілі мен әдебиеті», «Қазақ тілі мен әдебиеті», «Филология», «Жалпы медицина», «Фармация»,«Биотехнология», «Химиялық сараптама және өндірісті аналитикалық бақылау», «Азық-түлік қауіпсіздігі», «Өсімдіктер туралы ғылым және технология». Сыртқы сараптама комиссиясының жұмысы білім беру қызметтерінің жоғары сапасын, халықаралық стандарттарға сәйкестігін және Қозыбаев университетінің академиялық әлеуетін одан әрі дамытудың маңызды кезеңі болып табылады

Солтүстік Қазақстан облысы Адам құқықтары жөніндегі уәкілінің өкілі Жанат Жумабаевтың қолдауымен Қозыбаев университетінің кітапханасы №50 мекемеге (әйелдер колониясы) 700-ге жуық көркем, білім беру және танымдық әдебиеттерді сыйға тартты. Бұл басылымдар сотталғандардың ой-өрісін кеңейтуге, оқуға деген қызығушылығын арттыруға және өзін-өзі дамытуына мүмкіндік береді. Табыс етілген кітаптар олардың интеллектуалдық дамуына ықпал етіп, күнделікті өмірлерін әдебиетпен үндестіруге септігін тигізеді. Осындай бастамалар кітапхананың мәдениет және ағарту институты ретіндегі маңызды әлеуметтік миссиясын айқындайды-өмірлік жағдайларға қарамастан,  рухани қолдау көрсету. Оқу мәдениетін дамыту арқылы үміт пен жаңа мүмкіндіктерге жол ашамыз.

Қытай халықаралық білім көрмесі аясында Қазақстан Республикасы ғылым және жоғары білім вице-министрі Гүлзат Көбенова бастаған делегация Манаш Қозыбаев атындағы Солтүстік Қазақстан университетінің өкілдерімен және Хэнань ауыл шаруашылығы инвестициялық тобының бас директоры Чэнь Хуайань жетекшілік еткен делегациямен кездесу өткізді. Кездесу барысында тараптар «Қазақстан-Қытай аграрлық технологиялар және экспортты дамыту технопаркі» жобасын іске асыру барысын, сондай-ақ ауыл шаруашылығы, ғылым және технологиялар саласындағы ынтымақтастықты одан әрі тереңдету перспективаларын талқылады. Жоба Солтүстік Қазақстан облысы әкімдігінің, Қазақстан Республикасы Ғылым және жоғары білім министрлігінің қолдауымен және Манаш Қозыбаев атындағы Солтүстік Қазақстан университетінің тікелей қатысуымен жүзеге асырылуда. Университет жобаны практикалық іске асырудың негізгі алаңы ретінде айқындалып, оның базасында дайындық жұмыстары, ғылыми сүйемелдеу және тәжірибелік ауыл шаруашылығы жұмыстарын ұйымдастыру жүргізілуде. 2025 жылғы қараша айында Солтүстік Қазақстан облысының әкімі Ғауез Нұрмұхамбетов бастаған делегацияның Қытайға сапары барысында Бейжің қаласында университет пен Хэнань ауыл шаруашылығы инвестициялық тобы арасында ынтымақтастық туралы меморандумға қол қойылды. Бұл құжат жобаны практикалық іске асырудың негізін қалады. Бір жарым жыл ішінде қытайлық компания Өзбекстан, Малайзия және Қырғызстанды қоса алғанда, бірқатар елдерде жағдайларға салыстырмалы талдау жүргізді. Солтүстік Қазақстан облысы әкімдігінің қолдауын, өңірдің ғылыми әлеуеті мен инфрақұрылымдық мүмкіндіктерін ескере отырып, жобаны дәл осы өңірде іске асыру туралы шешім қабылданды. Осы мақсатта облыс әкімдігі университетке көлемі 61 гектар жер учаскесін бөліп беріп, жобаны ұйымдастырушылық және инфрақұрылымдық тұрғыдан қамтамасыз етуде. Жоба Қазақстан Республикасы Білім министрлігінің қолдауымен жүзеге асырылып, ғылыми базаны дамытуға, заманауи аграрлық технологияларды енгізуге және кадрлар даярлауға бағытталған. Хэнань ауыл шаруашылығы инвестициялық тобы Хэнань провинциясындағы ең ірі мемлекеттік кәсіпорындардың бірі және Қытайдағы жетекші аграрлық корпорациялардың бірі болып табылады. Компанияның жылдық айналымы 20 млрд АҚШ долларынан асады, ал топ құрамына агроөнеркәсіптік қызметтің толық спектрін қамтитын 170-тен астам еншілес компания кіреді. Жоба екі кезеңде іске асырылады. Бірінші кезеңде технопарк инфрақұрылымын құру, ғылыми-өндірістік базаны қалыптастыру және заманауи технологияларды енгізу көзделген. Қытайлық серіктес тарапынан инвестиция көлемі шамамен 10 млн АҚШ долларын құрайды. Құрылыс аумағы шамамен 35 000 шаршы метрді құрайды, оның құрамына қойма кешендері, ғылыми-зерттеу және әкімшілік ғимараттар, жатақханалар, ауыл шаруашылығы техникасына арналған инфрақұрылым, сондай-ақ заманауи жылыжай кешендері кіреді. Осы кезеңде Манаш Қозыбаев атындағы Солтүстік Қазақстан университеті мен Хэнань ауыл шаруашылығы инвестициялық тобы бірлескен кәсіпорын құрады. Бұл кәсіпорын технопаркті салу, басқару және одан әрі дамыту жұмыстарын жүзеге асырып, оның тиімді әрі тұрақты қызмет етуін қамтамасыз етеді. Университет өз кезегінде ғылыми сүйемелдеуді қамтамасыз етеді: зерттеулер жүргізу, тәжірибелік және демонстрациялық жұмыстарды ұйымдастыру, технологиялық шешімдер әзірлеу, деректерді өңдеу, технологиялар трансферін жүзеге асыру және мамандар даярлау. Жобаны іске асырудың негізгі бағыттарына мыналар кіреді: селекция және тұқым шаруашылығы; ауыл шаруашылығы дақылдарының өнімділігін арттыру; механикаландыру, автоматтандыру және цифрлық технологияларды енгізу; жасанды интеллект негізіндегі шешімдерді қолдану; ауыл шаруашылығы өнімдерін өңдеу және экспорттық тізбектерді дамыту. Кейінгі кезеңде ауыл шаруашылығы өнімдерін терең өңдеуді дамытуға, агроөнеркәсіптік тізбекті кеңейтуге және жоғары қосылған құны бар заманауи аграрлық индустриялық кластер қалыптастыруға инвестициялар қарастырылады. Мемлекет басшысы Қасым-Жомарт Тоқаев ғалымдарды марапаттау рәсімінде сөйлеген сөзінде: «Ғылыми әлеуетті ел игілігі үшін тиімді пайдалану қажет. Ғалымдардың жетістіктері тек кабинет деңгейінде қалып қоймауы тиіс. Нақты нәтиже беретін және өндірісте қолданылатын жобаларды жүзеге асыру қажет. Бір сөзбен айтқанда, ғылым экономика мен қоғамның қажеттіліктеріне қызмет етуі тиіс», — деп атап өтті. Аталған жобаны іске асыру осы міндеттерге толық сәйкес келеді және Қазақстанның аграрлық секторын дамытуға кешенді әсер етеді. Атап айтқанда, ол елдің азық-түлік қауіпсіздігін нығайтуға, ауыл шаруашылығын жаңғыртуды жеделдетуге, агроөнеркәсіптік тізбекті және терең өңдеуді дамытуға, экспорттық әлеуетті арттыруға, жаңа жұмыс орындарын ашуға және ғылыми база мен кадрлар даярлау жүйесін нығайтуға ықпал етеді. Аталған жоба Орталық Азияда алғаш рет өңірлік билік органдары, университет және ірі қытайлық инвестициялық компанияның қатысуымен жүзеге асырылып отырған, инвестициялар, ғылым және технологияларды біріктіретін кешенді жоба болып табылады. Қазіргі уақытта жоба іске асыру кезеңінде және Манаш Қозыбаев атындағы Солтүстік Қазақстан университеті базасында жүзеге асырылуда. Алдағы уақытта тараптар ынтымақтастықты одан әрі тереңдетуді жоспарлап отыр, бұл Қазақстанның аграрлық секторын дамытуға және Қазақстан мен Қытай арасындағы стратегиялық әріптестікті нығайтуға маңызды үлес қосады.

Жоғары оқу орнында ерікті студенттердің және Петропавл қ. ПБ ЖППБ полиция қызметкерлерінің қатысуымен зардап шеккендерге алғашқы шұғыл медициналық көмек көрсету бойынша практикалық семинар өтті. Сабақты облыстық жедел медициналық жәрдем орталығы директорының орынбасары В. В. Жужгов жүргізді. Сабақтың мақсаты – төтенше жағдайларда зардап шегушіге алғашқы медициналық көмек көрсету кезінде дұрыс шешім қабылдау дағдыларын қалыптастыру. Қазіргі таңда қауіпсіздік деңгейін арттыру және төтенше жағдайларға дайындықты күшейту студенттерге алғашқы медициналық көмек көрсету дағдыларын үйретуде кешенді тәсілді талап етеді. Осы бағыттағы тиімді әдістердің бірі-оқиға орнында көмек көрсету барысында студенттердің полиция қызметкерлерімен тығыз өзара іс-қимылын ұйымдастыру  болып табылады. Студенттер топпен жұмыс істеуді, жедел шешім қабылдауды тәжірибе жүзінде меңгерді. Іс-шара барысында қатысушылар жәбірленушінің жағдайын бақылауды үйренді: жарақаттар, қан кету, күйік, суға бату және тыныс алуды тексеру. Сонымен қатар жүрек-өкпе реанимациясын жүргізу, қан кетуді тоқтату және зақымдалған аяқ-қолдарды иммобилизациялау дағдыларына ерекше көңіл бөлінді. Оқыту нәтижесінде қатысушылар алғашқы медициналық көмек көрсету құралдарын және әрекет алгоритмдерін тиімді қолдана отырып, төтенше жағдайларда жедел әрі дұрыс әрекет ету қабілеттерін көрсетті.

Қозыбаев университеті талапкерлерді еліміздің жоғары оқу орындарында және халықаралық филиалдарда оқу мүмкіндіктерімен таныстыруға бағытталған Study in Kazakhstan республикалық білім беру көрмесіне қатысты. Бірінші кезең аясында университет өкілдері Астана, Павлодар, Семей және Өскемен қалаларына барды. Көрме барлығы 10 000-ға жуық талапкер жиналды. Кездесу барысында болашақ студенттер білім беру бағдарламалары, қабылдау шарттары, сондай-ақ оқудың артықшылықтары туралы толық ақпарат алды. Аризона университетімен бірлесіп жүзеге асырылатын қос дипломды бағдарламаларға 60-қа жуық талапкер қызығушылық танытты. Study in Kazakhstan көрмесі талапкерлерге Қазақстандағы жоғары білім туралы өзекті ақпарат алуға, жетекші жоғары оқу орындарымен танысуға мүмкіндік береді. Көрменің келесі кезеңі еліміздің оңтүстік өңірлерін қамтиды, онда университет командасы талапкерлермен белсенді кәсіптік бағдар беру жұмыстарын жалғастырады.

Қозыбаев университетінің делегациясы Бейжің қаласында өткен 31-ші Қытай халықаралық білім беру көрмесіне (CIEET) қатысты. Бұл іс-шара әлемнің жетекші университеттерін біріктіретін білім беру саласындағы ірі халықаралық платформалардың бірі болып табылады. Университеттің көрмеге қатысуы халықаралық ынтымақтастықты дамыту және жаһандық білім беру кеңістігіндегі позициясын нығайту жолындағы маңызды қадам болды. CIEET аясында ЖОО жаңа буын мамандарын даярлауға бағытталған білім беру бағдарламаларын таныстырды. Қос дипломды білім беру мүмкіндіктеріне, сондай-ақ халықаралық ғылыми жобаларға қатысуға ерекше назар аударылды. Бұл бағыттар шетелдік әріптестер тарапынан жоғары қызығушылық тудырды. Іс-шара барысында Қытай Халық Республикасының жоғары оқу орындарының өкілдерімен бірқатар іскерлік кездесулер өтті. Жиында студенттер мен оқытушылардың академиялық ұтқырлығын дамыту перспективалары, сондай-ақ бірлескен білім беру бастамаларын кеңейту мүмкіндіктері талқыланды. Шетелдік талапкерлер мен университеттер, соның ішінде Қытай және Алжир өкілдері тарапынан көрсетілген қызығушылық ерекше атап өтуге тұрарлық. Бұл бағыт оқу ордамыздың интернационалдандыру үдерісін одан әрі жандандырады. CIEET көрмесі университетті халықаралық деңгейде ілгерілетуге, академиялық және ғылыми ынтымақтастықты дамытуға жаңа мүмкіндіктер ашты.

Қозыбаев оқулары-2026 іс-шарасында ЖОО-да ҚР Ғылым қызметкерлері күніне арналған салтанатты марапаттау рәсімі өтті. Ғалымдар, педагогтар, қызметкерлер, ЖОО серіктестері және білім алушылар марапатталды: Қазақстан Республикасы Ғылым және жоғары білім министрлігінің «Ана тілін дамытуға қосқан үлесі үшін» төсбелгісі: 1.       Тайшыбай Зарқын Сыздықұлы – «Журналистика және әлеуметтік ғылымдар» кафедрасының еңбек сіңірген профессоры; 2.       Хамзина Гульбарам Саятовна – «Foundation» факультетінің деканы. Қазақстан Республикасы Ғылым және жоғары білім министрлігінің «Ахмет Байтұрсынұлы» төсбелгісі: 1.       Сабиева Елена Викторовна-Тіл және әдебиет институтының директоры; 2.       Маликова Сауле Зейнуллиновна-Солтүстік Қазақстан облыстық мұрағатының директоры. Қазақстан Республикасы Ғылым және жоғары білім министрлігінің «Ғылым үздігі» құрмет дипломдары: 1.       Мухатаева Жанар Ахангалиевна – Музыкалық пәндер кафедрасының аға оқытушысы; 2.       Тюканько Виталий Юрьевич – Химия және химиялық технологиялар кафедрасының аға зерттеушісі. Қазақстан Республикасы Ғылым және жоғары білім Министрлігінің құрмет грамотасы: 1.       Байбусинов Ерболат Махметович-инфрақұрылымды дамыту жөніндегі Басқарма мүшесі; 2.       Бызова Юлия Сергеевна - халықаралық кампустың қауымдастырылған профессоры; 3.       Темирбулатова Акерке Курмановна – Агрономия және орман шаруашылығы кафедрасының аға оқытушысы; 4.       Шарапаев Петр Анатольевич – Радуга ЖШС атқарушы директоры Қазақстан Республикасы Ғылым және жоғары білім министрлігінің алғысхаты: 1.       Белгибекова Асем Болатовна – «Педагогика және психология» кафедрасының меңгерушісі; 2.       Гумель Елена Борисовна – «Педагогика және психология» кафедрасының аға оқытушысы; 3.       Базарбаева Сауле Мухаметкалиевна – «Биология» кафедрасының қауымдастырылған профессоры; 4.       Гордиянова Галина Владимировна – «География және экология» кафедрасының аға оқытушысы; 5.       Мусурова Сауле Джамбуловна-агрокомпетенциялар орталығының өсімдік шаруашылығы жөніндегі ғылыми үйлестірушісі; 6.       Нурмагамбет Ойрат Еркебұланұлы – «Мамбетов и К» КТ бас директоры; Қазақстан Республикасы Экология және табиғи ресурстар министрлігінің «Экология саласының үздігі» төсбелгісі 1.       Искандирова Зауре Сыздыковна- «География және экология» кафедрасының аға оқытушысы. Қазақстан Республикасы Ауыл шаруашылығы министрлігінің «Ауыл шаруашылығы саласының үздігі» төсбелгісі: 1.       Савенкова Инна Витальевна - Агрономия және орман шаруашылығы кафедрасының доценті; 2.       Туменова Галия Тлеухановна - Азық-түлік қауіпсіздігі кафедрасының профессоры. Қазақстан Республикасы Су ресурстары және ирригация министрлігінің «Су шаруашылығы үздігі» төсбелгісі: 1.       Пашков Сергей Владимирович – География және экология кафедрасының профессоры. Солтүстік Қазақстан облысы әкімінің Құрмет грамотасы: 1. Берилло Дмитрий Александрович-Ғылым және технологиялық даму департаментінің бас ғылыми қызметкері; 2. Наумов Александр Владимирович- Дене шынықтыру және спорт кафедрасының аға оқытушысы. 3. Какимова Майра Еренгаиповна- Герман-роман филологиясы кафедрасының меңгерушісі; 4.Шахметова Гаухар Мейрамовна - Агрономия және орман шаруашылығы кафедрасының аға оқытушысы. Солтүстік Қазақстан облысы әкімінің Алғыс хаты: 1. Смагулова Екатерина Николаевна-коммерцияландыру кеңсесінің ілгерілету және коммуникациялар жөніндегі менеджері; 2. Герасимова Юлия Викторовна - Энергетика және радиоэлектроника кафедрасының доценті; 3. Сартин Сергей Александрович - Математика және физика кафедрасының доценті. 4. Аубәкірова Бахыткул Бокаевна - Құрылыс және дизайн кафедрасының меңгерушісі; 5. Шеффинг Елена Николаевна - Музыкалық пәндер кафедрасының аға оқытушысы; 6. Кузьменко Юлия Викторовна - Экономика, Есеп және қаржы кафедрасының аға оқытушысы; 7. Усеинов Азамат Қайсаевич - Агрономия және орман шаруашылығы кафедрасының аға оқытушысы; 8. Садуов Марат Жангельдинович - География және экология  кафедрасының аға оқытушысы. Манаш Қозыбаев атындағы Солтүстік Қазақстан университетінің құрметті профессоры: 1.       Наумов Александр Владимирович - Дене шынықтыру және спорт кафедрасының аға оқытушысы. «Академик Манаш Қозыбаев» Медалі: 1. Сабитов Жаксылык Муратович-PhD, ұлы Жошы ғылыми-зерттеу институтының директоры; 2. Темирханова Асемгуль Сериковна -PhD, ғылыми хатшы; Манаш Қозыбаев атындағы Солтүстік Қазақстан университетінің Директорлар кеңесінің төрағасы Құрмет грамотасы 1. Қиясбек Меруерт- Ә. Марғұлан ат. археология институты филиалының директоры, Петропавл қ.; 2. Джелал Чекен-халықаралық кампус профессоры; 3. Андреа Зукколо-халықаралық кампус профессоры; 4. Кожабекова Ботагөз Сапаровна-М.Қозыбаев ат.Тарих музейінің жетекшісі; 5. Еслямова Зарема Сагидолаевна-ғылым және технологиялық даму департаментінің әдіскері; 6. Жумабаева Ботогоз Кадыржановна-ғылым және технологиялық даму департаментінің әдіскері. «Үздік зерттеуші-студент» байқауының жеңімпаздары 200 мың теңге көлемінде қаржылай сыйлық алды: 1. Герасимов Даниил; 2. Сыздыкова Ажара; 3. Суиндықов Бахытжан; 4. Кормин Богдан; 5. Бекбаулова Алуа; 6. Ашимова Аяжан. Манаш Қозыбаев атындағы №23 жалпы білім беретін мектепке (Қостанай қ.) Қозыбаев университетінің Басқарма Төрағасы – Ректоры атынан Құрмет грамотасы табысталды.   Құттықтаймыз!

Манаш Қозыбаевтың 95 жылдығына орай және Ғылым қызметкерлері күні аясында Қозыбаев университетінде көрнекті қазақстандық ғалым-тарихшы, академик Манаш Қозыбаевтың 95 жылдығына арналған «Қозыбаев оқулары-2026:болашақ экожүйесі,технологиялар мен адам капиталын дамытудың синергиясы» атты халықаралық ғылыми-практикалық конференция ұйымдастырылды. Алдымен университет ұжымы мен білім алушылар жылдағы дәстүрмен, ғалымның ескерткішіне гүл шоқтарын қойып, Манаш Қабашұлының  рухына тағзым етті. Қонақтарға агрохиманалитика, су сапасын бағалау, микробиология бағыттары бойынша  Kozybayev Labs ғылыми-зерттеу зертханалары таныстырылды. Қозыбаев оқулары ЖОО-да 2003 жылдан бері дәстүрлі түрде ұйымдастырылып келеді. Осы жылы конференция әлемнің түкпір-түкпірінен келген қазақстандық, қытайлық, ресейлік және т.б. сарапшыларды, зерттеушілерді, оқытушыларды, студенттер мен ғалымдарды және қоғам қайраткерлерін біріктірді. ҚР ғылым және жоғары білім министрі Саясат Нұрбек, СҚО әкімі Гауез Нұрмұхамбетов және Аризона университетінің (АҚШ) өкілдері құттықтау лебіздерін жолдады. Конференция жұмысы математикалық, жаратылыстану ғылымдары, әлеуметтік, құқықтық, экономикалық, медициналық, педагогикалық, техникалық, ауылшаруашылық ғылымдары, басқарудағы ақпараттық жүйелер, филология және жаһандық академиялық серіктестік аясында ғылым, технология және білім беруді интеграциялау бойынша секциялық отырыстарда жалғасын тапты. Қатысушылар Манаш Қозыбаевтың өмірі мен шығармашылығына арналған «Тарихтың тарланбозы»  көрмесінде тарихшының мұрасымен танысты. Манаш Қабашұлы-қазақ халқының біртуар тұлғаларының бірі. Ғалымның  өмір жолы- оның қазақстандық ғылымға көпжылдық адал еңбегінің жарқын үлгісі. Тәуелсіздік жылдарында қазақтың азат ойлы, дербес тарихнамасын қалыптастырған ірі тарихшы. Ғалым тәуелсіз Қазақстанның идеологиясын қалыптастыруға елеулі үлес қосты. Өзінің «Манаш Қозыбаев- Қазақстан Тәуелсіздігі туралы» атты баяндамасында СҚУ профессоры Зарқын Тайшыбай, Манаш Қабашұлының отандық тарих ғылымының қалыптасуы мен дамуына қосқан зор үлесін ерекше атап өтті. Профессордың айтуынша, Манаш Қозыбаев Қазақстан тарихын тәуелсіздік тұрғысынан зерделеудің ғылыми негізін қалап, тарихи сананы жаңғыртуға бағытталған жаңа бағыттың қалыптасуына жол ашты. ҚР еңбек сіңірген қайраткері Қозыбаев Ілияс Манашұлы өз сөзінде әке жайлы тағылымды естеліктерімен бөлісіп,өнегелі өмірлік жолы туралы айтып өтті: «Әкем 24 жыл бұрын өмірден озды, бірақ қалдырған естеліктері әлі күнге дейін жадымда. Әке ретінде ол ешқашан қаталдық танытпайтын. Оның жүріс-тұрысына, адамгершілік қасиеттеріне, замандастарымен қарым-қатынасына қарап, біз бой түзейтінбіз. Қызметтен шаршап келсе де, отбасына әрдайым көп көңіл бөлетін. Немерелерін ерекше жақсы көріп, оларды еңбекке, жұмысқа баулуға тырысты. Олар үшін орысша ертегілерді қазақшаға аударып беретін. Бүгінгі күнге дейін немерелері аталарының қамқорлығы мен жылулығын ұмытқан емес». ПОҚ, қызметкерлер мен білім алушыларды университеттік наградалармен, сондай-ақ СҚО әкімдігінің грамоталарымен және алғыс хаттарымен марапаттау рәсімі өтті. Іс-шара аясында Қостанай қаласының Манаш Қозыбаев ат. №23 жалпы білім беретін мектебімен ынтымақтастық туралы меморандум жасалды. Бұл халықаралық конференция көрнекті ғалымның рухына тағзым етіп, оның ғылыми мұрасын дәріптеуге және жалғастыруға мүмкіндік береді.